🚨 गुन्हा दाखल न करण्यासाठी ५० हजारांची लाच मागितली; मुकुंदवाडी पोलिस ठाण्यात एसीबीचा सापळा, एपीआयसह पोलिस अंमलदार रंगेहात जेरबंद!

छत्रपती संभाजीनगर : मुलीच्या वादासंदर्भातील तक्रारीत कारवाई टाळून गुन्हा दाखल न करण्यासाठी ५० हजार रुपयांची लाच मागणाऱ्या मुकुंदवाडी पोलिस ठाण्यातील सहायक पोलिस निरीक्षक (एपीआय) संजय नागूसिंग बहुरे (वय ४३) आणि पोलिस अंमलदार गोकुळ अनिलराव खटावकर (वय ४३) यांना लाचलुचपत प्रतिबंधक विभागाने (एसीबी) रंगेहाथ अटक केली. शुक्रवारी सायंकाळी करण्यात आलेल्या या कारवाईमुळे शहर पोलिस दलात मोठी खळबळ उडाली आहे.

मिळालेल्या माहितीनुसार, २२ वर्षीय महाविद्यालयीन विद्यार्थ्याविरोधात काही दिवसांपूर्वी एका मुलीच्या वादासंदर्भात मुकुंदवाडी पोलिस ठाण्यात तक्रार दाखल झाली होती. संबंधित तरुण आणि तक्रारदार मुलगी यांच्यात नंतर समझोता होऊन वाद मिटला होता. मात्र, तरीही पोलिसांकडून कारवाईची भीती दाखवत गुन्हा दाखल करण्याची धमकी देण्यात येत होती. त्यासाठी ५० हजार रुपयांची मागणी करण्यात आल्याचा आरोप आहे.

या त्रासाला कंटाळून विद्यार्थ्याने एसीबीकडे तक्रार दाखल केली. एसीबीच्या अधीक्षक माधुरी कांगणे आणि अपर अधीक्षक शशिकांत सिंगारे यांच्या मार्गदर्शनाखाली पोलिस निरीक्षक संतोष तिगोटे यांनी तक्रारीची पडताळणी केली. चौकशीत लाचेची मागणी होत असल्याचे स्पष्ट झाल्यानंतर सापळा रचण्यात आला.

तडजोडीनंतर पहिल्या टप्प्यात १० हजार रुपये देण्याचे ठरले. शुक्रवारी सायंकाळी तक्रारदाराने ठरल्याप्रमाणे रक्कम दिली असता, पोलिस अंमलदार खटावकर हे एपीआय बहुरे यांच्या सांगण्यावरून लाच स्वीकारत असल्याचे निष्पन्न झाले. लाच स्वीकारल्यानंतर ठरलेल्या संकेताप्रमाणे तक्रारदाराने इशारा दिला. त्यानंतर दबा धरून बसलेल्या एसीबी पथकाने तत्काळ धाव घेत दोन्ही आरोपींना ताब्यात घेतले.

या प्रकरणी उशिरापर्यंत गुन्हा दाखल करण्याची प्रक्रिया सुरू होती. पुढील तपास पोलिस निरीक्षक वाल्मीक कोरे करत आहेत. एसीबीच्या या कारवाईमुळे पोलिस विभागातील भ्रष्टाचाराचा आणखी एक प्रकार उघडकीस आला असून, शहरात या घटनेची जोरदार चर्चा सुरू आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*