🚨 रिक्षाचालकांवर पोलिसांची ‘धडाकेबाज’ ॲक्शन! शहरभर विशेष मोहीम राबवत १,२२५ रिक्षांवर कारवाई; ९६ रिक्षा जप्त, लाखोंचा दंड ठोठावला

छत्रपती संभाजीनगर : शहरातील वाहतूक शिस्त अबाधित ठेवण्यासाठी वाहतूक शाखेकडून बेशिस्त रिक्षाचालकांविरोधात विशेष मोहीम राबविण्यात आली. या मोहिमेत वाहतूक नियमांचे उल्लंघन करणाऱ्या तब्बल १,२२५ रिक्षांवर दंडात्मक कारवाई करण्यात आली असून ₹९ लाख ५२ हजार ५०० रुपयांचा दंड आकारण्यात आला आहे. यापैकी ₹६ लाख ३१ हजार ६०० रुपयांचा दंड वसूल करण्यात आला असून ९६ रिक्षा जप्त करण्यात आल्या आहेत.

वाहतूक शाखेकडून शहरात सातत्याने वाहतूक नियमांची अंमलबजावणी केली जात असताना बेशिस्त, उद्धट व बेफिकीरपणे रिक्षा चालविणारे चालक, रिक्षांवर बेशिस्तपणे प्रवासी वाहतूक करणारे, विना गणवेश रिक्षा चालविणारे, फ्रंट सीटवर प्रवासी बसविणारे, विना परवाना वाहन चालविणारे तसेच मोठ्या प्रमाणात प्रलंबित दंड असलेल्या रिक्षाचालकांविरोधात ही विशेष कारवाई करण्यात आली.

काल मंगळवार रोजी सकाळी ११ ते रात्री ८ वाजेपर्यंत राबविण्यात आलेल्या या मोहिमेदरम्यान वाहतूक पोलिसांनी शहरातील विविध ठिकाणी तपासणी नाके उभारून नियमभंग करणाऱ्या रिक्षाचालकांवर कठोर कारवाई केली. या मोहिमेमुळे वाहतूक नियमांचे उल्लंघन करणाऱ्यांना चांगलाच धडा मिळाला असून शहरातील वाहतूक शिस्त अधिक मजबूत करण्याचा प्रयत्न करण्यात आला आहे.

ही कारवाई पोलीस आयुक्त प्रवीण पवार, पोलीस उपआयुक्त शर्मिष्ठा घारगे-वालावलकर, सहाय्यक पोलीस आयुक्त (वाहतूक) सुभाष भुजंग यांच्या मार्गदर्शनाखाली वाहतूक शाखेच्या अधिकारी व अंमलदारांनी केली.

दरम्यान, वाहतूक शाखेने स्पष्ट केले आहे की, नियमांचे पालन करून व्यवसाय करणाऱ्या रिक्षाचालकांना कोणताही त्रास दिला जाणार नाही. मात्र, उद्धट, उर्मट व बेशिस्त रिक्षाचालकांविरोधातील अशा विशेष मोहिमा यापुढेही सातत्याने सुरू राहतील. तसेच सर्व रिक्षाचालक आणि वाहनधारकांनी वाहतूक नियमांचे काटेकोर पालन करून शिस्तीत वाहन चालवावे, असे आवाहन वाहतूक शाखेकडून करण्यात आले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KYaIrqX6xIM3SpZ1FYjFWw?s=cl&p=a&ilr=0

*जाहिरातीसाठी_संपर्क करा 8329014805*