🚨 १५ ऑगस्टपासून मोठ्या संस्थांचा कचरा महापालिका उचलणार नाही; जागेवरच प्रक्रिया बंधनकारक

छत्रपती संभाजीनगर : शहरात दररोज १०० किलो किंवा त्यापेक्षा अधिक कचरा निर्माण करणाऱ्या मोठ्या संस्था, आस्थापना आणि व्यावसायिक संकुलांचा कचरा १५ ऑगस्टपासून महानगरपालिका उचलणार नसल्याचा महत्त्वपूर्ण निर्णय घेण्यात आला आहे. घनकचरा व्यवस्थापन नियम-२०२६ अंतर्गत हा निर्णय लागू करण्यात येत असून, संबंधित संस्थांना स्वतःच कचऱ्याचे वर्गीकरण करून त्यावर जागेवरच प्रक्रिया करणे बंधनकारक राहणार आहे.

या नियमांतर्गत हॉटेल्स, मंगल कार्यालये, मेजवानी सभागृहे, व्यापारी संकुले, शैक्षणिक संस्था, रुग्णालये, उद्योग तसेच इतर मोठ्या आस्थापनांना ओला आणि सुका कचरा वेगळा करून त्याची विल्हेवाट लावावी लागणार आहे. त्यासाठी खतनिर्मिती प्रकल्प, जैववायू प्रकल्प किंवा शासनमान्य कचरा प्रक्रिया यंत्रणा उभारणे आवश्यक राहील. तसेच केंद्रीय प्रदूषण नियंत्रण मंडळाच्या नोंदणी प्रणालीवर नोंदणी करणेही संबंधित संस्थांसाठी अनिवार्य करण्यात आले आहे.

महापालिकेच्या प्राथमिक अंदाजानुसार शहरातील २०० हून अधिक संस्था या नियमाच्या कक्षेत येत असून, नियमांचे पालन न करणाऱ्यांवर दंडात्मक कारवाई केली जाणार आहे. यामुळे शहरातील कचरा व्यवस्थापन अधिक प्रभावी होण्यास मदत होणार असल्याचे प्रशासनाने स्पष्ट केले आहे.

दरम्यान, सार्वजनिक किंवा खासगी कार्यक्रमांचे आयोजकही या नियमांपासून वगळले जाणार नाहीत. कोणताही मोठा कार्यक्रम आयोजित करण्यापूर्वी महापालिकेला पूर्वसूचना देणे बंधनकारक राहील. कार्यक्रमाला अपेक्षित गर्दी, निर्माण होणाऱ्या कचऱ्याचे प्रमाण याची माहिती द्यावी लागेल. कचऱ्याच्या प्रमाणानुसार शुल्क आकारले जाईल. कार्यक्रमानंतर परिसरात कचरा किंवा अस्वच्छता आढळल्यास संबंधित आयोजकांवर दंडात्मक कारवाई करण्यात येणार आहे.

शहर स्वच्छ, सुंदर आणि पर्यावरणपूरक ठेवण्यासाठी मोठ्या संस्था, व्यापारी, आयोजक आणि नागरिकांनी कचरा व्यवस्थापनाची जबाबदारी स्वीकारून नियमांचे काटेकोर पालन करावे, असे आवाहन महापालिका आयुक्त अमोल येडगे यांनी केले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KYaIrqX6xIM3SpZ1FYjFWw?s=cl&p=a&ilr=0

*जाहिरातीसाठी_संपर्क करा 8329014805*