नवी दिल्ली : देशभरातील सरकारी बँक कर्मचाऱ्यांनी २८ ते ३० सप्टेंबरदरम्यान पुकारलेला तीन दिवसांचा संप आता पुढे ढकलण्यात आला आहे. इंडियन बँक्स असोसिएशन (IBA) आणि युनायटेड फोरम ऑफ बँक युनियन्स (UFBU) यांच्यात रविवारी रात्री झालेल्या महत्त्वपूर्ण बैठकीनंतर हा निर्णय घेण्यात आला. त्यामुळे सलग सुट्ट्यांमुळे बँकिंग सेवा प्रभावित होण्याची शक्यता असलेल्या ग्राहकांना मोठा दिलासा मिळाला आहे.
बँक कर्मचाऱ्यांच्या विविध संघटनांनी आपल्या प्रलंबित मागण्यांसाठी देशव्यापी आंदोलनाची घोषणा केली होती. शनिवार-रविवारच्या साप्ताहिक सुट्ट्यांनंतर सोमवारपासून तीन दिवस संप होणार असल्याने बँकिंग व्यवहारांवर मोठा परिणाम होण्याची शक्यता होती. ग्राहकांची गैरसोय टाळण्यासाठी रविवारी, २७ सप्टेंबर रोजीही अनेक बँकांच्या शाखा सुरू ठेवण्यात आल्या होत्या.
दरम्यान, रविवारी रात्री साडेनऊ वाजता IBA आणि UFBU यांच्यात चर्चा झाली. बैठकीत कर्मचाऱ्यांच्या विविध मागण्यांवर सविस्तर विचारविनिमय करण्यात आला. उर्वरित सर्व शनिवार सुट्टी जाहीर करण्याच्या मागणीवर पुढील चर्चा करण्यासाठी IBA आणि UFBU यांची उच्चस्तरीय समिती स्थापन करण्याचे ठरले. ही समिती संबंधित घटकांशी चर्चा करून व्यवहार्य तोडगा शोधणार आहे.
तसेच स्केल-IV आणि त्यावरील अधिकाऱ्यांसाठीच्या परफॉर्मन्स लिंक्ड इन्सेंटिव्ह (PLI) योजनेबाबत संघटनांनी मांडलेल्या मुद्द्यांवरही चर्चा करून आवश्यक सुधारणा सुचविण्याची प्रक्रिया सुरू करण्याचे ठरले आहे. ८ मार्च २०२४ रोजी झालेल्या बैठकीतील उर्वरित मुद्द्यांवरही दोन्ही बाजूंमध्ये पुढील चर्चा केली जाणार आहे.
या चर्चेनंतर UFBU ने प्रस्तावित आंदोलन आणि संप स्थगित करण्यास सहमती दर्शवली. सर्व शनिवार सुट्टी, जुन्या पेन्शन योजनेतील सुधारणा तसेच महागाई भत्ता आणि पेन्शनशी संबंधित प्रलंबित मागण्या या कर्मचाऱ्यांच्या प्रमुख मागण्यांमध्ये होत्या.
संप स्थगित झाल्याने २८ ते ३० सप्टेंबरदरम्यान बँकांचे नियमित कामकाज सुरू राहण्याचा मार्ग मोकळा झाला आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/EOeAE4QPeWR14rmQMaPbCz?s=cl&p=a&mlu=4&ilr=4
*जाहिरातीसाठी_संपर्क करा 8329014805*