🔧 यूट्यूबची शाळा, जिद्दीची ताकद : वाळूजच्या तरुणाने बनवली देशी मिनी जिप्सी

छत्रपती संभाजीनगर : जिल्ह्यातील वाळूज परिसरातील २५ वर्षीय सतीश मुंडे या तरुणाची सध्या सर्वत्र चर्चा होत आहे. साधनांची कमतरता, अपूर्ण शिक्षण आणि दुष्काळी पार्श्वभूमी असूनही जिद्द आणि कल्पकतेच्या जोरावर सतीशने अवघ्या चार महिन्यांत दुचाकीच्या इंजिनवर आधारित देशी ‘मिनी जिप्सी’ तयार करून ग्रामीण नवउद्योगाचे जिवंत उदाहरण उभे केले आहे.

औपचारिक तांत्रिक शिक्षण पूर्ण करता आले नसले तरी सतीशने यूट्यूबला आपली शाळा मानले. विविध व्हिडिओच्या माध्यमातून वाहन रचना, तांत्रिक जोडणी आणि यांत्रिकीचे बारकावे आत्मसात करत त्याने स्वतःची कल्पनाशक्ती प्रत्यक्षात उतरवली. तयार करण्यात आलेल्या या मिनी जिप्सीसाठी दुचाकीचे इंजिन, छोट्या टेंपोची चाके, एम-८० दुचाकीचे हेडलाइट आणि इतर विविध दुचाकींचे पार्टस वापरण्यात आले आहेत. अवघी तीन फूट उंची असलेल्या या जिप्सीत चार जण आरामात प्रवास करू शकतात, तसेच ती एक लिटर पेट्रोलमध्ये सुमारे ४० किलोमीटरचे मायलेज देते.

ही जिप्सी उभी करण्यासाठी सतीशला चार महिन्यांचा कालावधी लागला. कारचे स्टिअरिंग त्याने स्वतःच्या वर्कशॉपमध्ये तयार केले, तर डिझाइनसाठी जाड पत्रा लेझर कट करून वेल्डिंगद्वारे संपूर्ण गाडीचा सांगाडा उभारण्यात आला. यासाठी सुमारे सव्वा लाख रुपयांचा खर्च झाला असल्याचे सतीशने सांगितले.

सतीशचे मूळ गाव बीड जिल्ह्यातील दुष्काळी लोनारवाडी (ता. परळी) आहे. रोजगाराच्या शोधात आठ वर्षांपूर्वी कुटुंब वाळूज एमआयडीसीत आले. आज सतीशचे स्वतःचे वर्कशॉप असून तो विविध कंपन्यांची मेंटेनन्सची कामे करतो. याआधी बारावीच्या काळात त्याने हेलिकॉप्टरची निर्मिती केली होती, तर वर्षभरापूर्वी यूट्यूबच्या मदतीने बनवलेले देशी ट्रॅक्टर दोन लाख रुपयांना विकले गेले. सतीश मुंडेची ही कहाणी प्रतिकूल परिस्थितीतून उभारी घेणाऱ्या ग्रामीण तरुणांसाठी नक्कीच प्रेरणादायी ठरत आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/F4uD1Fqnz3sBgCKFsrOSDq

*जाहिरातीसाठी_संपर्क करा 8329014805*