🌞 हिवाळ्याला निरोप, उन्हाळ्याची आगमनघोषणा! फेब्रुवारीतच छत्रपती संभाजीनगर तापू लागले 🔥

छत्रपती संभाजीनगर : उन्हाळा सुरू होण्यासाठी अजून साधारण महिनाभराचा कालावधी शिल्लक असतानाच छत्रपती संभाजीनगर शहरात फेब्रुवारी महिन्यातच उन्हाळ्याची तीव्रता जाणवू लागली आहे. १५ फेब्रुवारी रोजी शहरातील कमाल तापमान थेट ३३.४ अंश सेल्सिअसवर पोहोचले असून ही यंदाच्या हंगामातील आतापर्यंतची सर्वोच्च नोंद ठरली आहे. परिणामी सकाळी नऊ वाजेपासूनच उन्हाचा चटका नागरिकांना जाणवू लागला असून दुपारच्या वेळी रस्त्यांवर शुकशुकाट पाहायला मिळत आहे.

यंदाचा हिवाळा तुलनेने अधिक थंड असल्याने किमान तापमानात मोठी घसरण झाली होती आणि शहरवासीयांनी चांगलीच हुडहुडी अनुभवली होती. मात्र फेब्रुवारीच्या सुरुवातीपासून हवामानात झपाट्याने बदल होत असून कमाल तापमानात सातत्याने वाढ होत आहे. गेल्या सहा दिवसांत तापमान ३१.८ अंशांपासून थेट ३३.४ अंशांपर्यंत पोहोचले आहे. त्याचबरोबर किमान तापमानही वाढून १७ अंशांच्या पुढे गेले आहे.

दिवसा प्रखर ऊन जाणवत असले तरी रात्री आणि पहाटे मात्र थंडीचा प्रभाव कायम आहे. ध्रुवीय वाऱ्यांमुळे गारवा टिकून असून सकाळच्या वेळेत अजूनही थंड वातावरण अनुभवायला मिळत आहे. हवामान तज्ज्ञांच्या अंदाजानुसार पुढील आठवड्यात कमाल तापमानात आणखी वाढ होण्याची शक्यता असून यंदाचा उन्हाळा अधिक तापदायक ठरण्याचे संकेत मिळत आहेत.

अचानक वाढलेल्या तापमानामुळे नागरिकांनी आरोग्याची काळजी घेणे गरजेचे झाले असून भरपूर पाणी पिणे, दुपारच्या वेळेत उन्हात जाणे टाळणे आणि हलका आहार घेण्याचा सल्ला डॉक्टरांकडून देण्यात येत आहे. शहरात उन्हाळ्याची चाहूल लवकर लागल्याने यंदाचा उन्हाळा अधिक कठीण जाण्याची शक्यता व्यक्त केली जात आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/LC9pzB4lHXXKDuIr4cUPAq?mode=gi_t

*जाहिरातीसाठी_संपर्क करा 8329014805*