📱 हरवलेले १५७ मोबाईल पुन्हा मालकांच्या हाती; सायबर पोलिसांची उल्लेखनीय कामगिरी

छत्रपती संभाजीनगर : शहरातील बाजारपेठा, शॉपिंग मॉल, बसस्थानक तसेच गर्दीच्या ठिकाणांहून चोरीला गेलेले तब्बल ३९ लाख रुपये किमतीचे १५७ मोबाईल फोन सायबर पोलिसांनी शोधून काढत मोठे यश मिळवले आहे. विशेष म्हणजे हे सर्व मोबाईल मूळ मालकांना पोलिस आयुक्त प्रवीण पवार यांच्या हस्ते परत देण्यात आले.

या कार्यक्रमाला गुन्हे शाखेचे उपायुक्त रत्नाकर नवले, शर्मिष्ठा वालावलकर, सहायक पोलिस आयुक्त (गुन्हे) अशोक राजपूत, सुभाष भुजंग यांच्यासह इतर वरिष्ठ अधिकारी उपस्थित होते. फेब्रुवारी ते एप्रिल २०२६ या कालावधीत शहरातील विविध भागांतून मोबाईल गहाळ किंवा चोरी झाल्याच्या तक्रारी प्राप्त झाल्या होत्या. त्यानंतर सायबर पोलिसांनी तांत्रिक तपास, लोकेशन ट्रॅकिंग आणि डिजिटल विश्लेषणाच्या माध्यमातून महाराष्ट्रासह इतर राज्यांमधून हे मोबाईल हस्तगत केले.

गुरुवारी आयोजित करण्यात आलेल्या विशेष कार्यक्रमात हे मोबाईल नागरिकांना परत करण्यात आले. आपले हरवलेले मोबाईल परत मिळाल्याने नागरिकांनी पोलिस प्रशासनाचे आभार मानले. या कार्यक्रमावेळी ५२ नागरिक उपस्थित होते.

मोबाईल शोध मोहिमेत सायबर पोलिस ठाण्याचे निरीक्षक सोमनाथ जाधव, सहाय्यक पोलिस निरीक्षक कदीर देशमुख, गणेश गिरी, वैभव वाघचौरे, गोकुळ कुत्तरवाड आणि त्यांच्या पथकाने महत्त्वाची भूमिका बजावली. सायबर पोलिसांच्या या कारवाईमुळे नागरिकांमध्ये विश्वास निर्माण झाला असून, चोरीच्या घटनांवर आळा बसण्यास मदत होणार असल्याचे सांगितले जात आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*