🚨 छत्रपती संभाजीनगरच्या दोन तरुणांचा जायकवाडी धरणात बुडून दुर्दैवी मृत्यू; परिसरात शोककळा

पैठण : जायकवाडी धरण परिसरात फिरण्यासाठी आलेल्या छत्रपती संभाजीनगर येथील दोन महाविद्यालयीन मित्रांचा पाण्यात बुडून दुर्दैवी मृत्यू झाल्याची हृदयद्रावक घटना रविवारी घडली. या घटनेमुळे परिसरात हळहळ व्यक्त होत असून मृत तरुणांच्या कुटुंबीयांवर दुःखाचा डोंगर कोसळला आहे.

मृत तरुणांची नावे अनिकेत मनू भारती (वय १९, रा. अंबिका नगर, मुकुंदवाडी) आणि संकेत सिद्धार्थ खरात (वय १८, रा. अंबिका नगर, मुकुंदवाडी, छत्रपती संभाजीनगर) अशी आहेत. दोघेही महाविद्यालयीन विद्यार्थी असून रविवारी सुट्टीचा दिवस असल्याने जायकवाडी धरण परिसर पाहण्यासाठी पैठण येथे आले होते.

मिळालेल्या माहितीनुसार, धरण परिसरात फिरत असताना दोघे मित्र पाण्याच्या काठावर गेले. त्यानंतर त्यांनी पोहण्यासाठी पाण्यात उतरण्याचा निर्णय घेतला. मात्र पाण्याची खोली आणि प्रवाहाचा योग्य अंदाज न आल्याने दोघेही पाण्यात बुडाले. काही वेळानंतर ही बाब परिसरातील नागरिकांच्या लक्षात आली. त्यांनी तातडीने पैठण पोलिसांना घटनेची माहिती दिली.

माहिती मिळताच पोलिसांनी घटनास्थळी धाव घेतली. तसेच पैठण नगर परिषदेच्या अग्निशमन दलाला पाचारण करण्यात आले. स्थानिक अनुभवी पोहणारे युवक आणि बचाव पथकाच्या मदतीने शोधमोहीम सुरू करण्यात आली. अनेक तासांच्या अथक प्रयत्नांनंतर संकेत सिद्धार्थ खरात याचा मृतदेह पाण्याबाहेर काढण्यात यश आले.

दरम्यान, रात्रीचा अंधार वाढल्यामुळे अनिकेत भारती याचा शोध घेण्यात अडथळे निर्माण झाले. त्यामुळे रविवारी रात्री शोधकार्य तात्पुरते स्थगित करण्यात आले. सोमवारी सकाळी पुन्हा बचाव पथक आणि स्थानिकांच्या मदतीने शोधमोहीम सुरू करण्यात आली. घटनेची माहिती मिळताच दोन्ही तरुणांच्या नातेवाईकांनी आणि मित्रपरिवाराने घटनास्थळी धाव घेतली. या दुर्दैवी घटनेमुळे संपूर्ण परिसरात शोककळा पसरली असून नागरिकांकडून हळहळ व्यक्त केली जात आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*