दिवाळीपूर्वी शेतकऱ्यांच्या खात्यात ₹५ हजार जमा होणार; कर्जवसुली न करण्याचे बँकांना निर्देश

मुंबई : राज्यात दुष्काळाची तीव्रता वाढत असताना शेतकरी आणि ग्रामीण भागातील नागरिकांसाठी राज्य सरकारने काही महत्त्वाचे निर्णय जाहीर केले आहेत. दिवाळीच्या पार्श्वभूमीवर शेतकऱ्यांच्या खात्यात पाच हजार रुपये अग्रीम स्वरूपात जमा करण्यात येणार असून, कर्जाच्या परतफेडीसाठी शेतकऱ्यांवर दबाव टाकू नये, असे निर्देश बँका आणि वित्तीय संस्थांना देण्यात आले आहेत. मुख्यमंत्री देवेंद्र फडणवीस यांनी मंत्रिमंडळ बैठकीनंतर ही माहिती दिली.

दुष्काळग्रस्त तालुक्यांच्या संख्येत वाढ

राज्यातील दुष्काळी परिस्थितीचा आढावा घेतल्यानंतर आणखी ४० तालुक्यांचा दुष्काळी यादीत समावेश करण्याचा निर्णय घेण्यात आला आहे. याआधी २६५ तालुके दुष्काळग्रस्त घोषित करण्यात आले होते. नव्या समावेशानंतर ही संख्या ३०५ वर पोहोचणार आहे. संबंधित भागांमध्ये दुष्काळ निवारणाच्या उपाययोजना राबविण्याची प्रक्रिया वेगाने पूर्ण करण्यावर सरकारचा भर राहणार आहे.

शेतकऱ्यांना कर्जवसुलीपासून दिलासा

दुष्काळामुळे आर्थिक संकटात सापडलेल्या शेतकऱ्यांकडे कर्जाच्या वसुलीसाठी तगादा लावू नये, अशी स्पष्ट भूमिका मुख्यमंत्र्यांनी मांडली. सहकारी सोसायट्या, जिल्हा बँका, राष्ट्रीयीकृत बँका आणि मायक्रोफायनान्स कंपन्यांना याबाबत सूचना देण्यात आल्या आहेत. शेतीसाठी साडेसात अश्वशक्तीपर्यंतचा वीजपुरवठा मोफत असल्याचेही त्यांनी नमूद केले.

परीक्षा शुल्कातून विद्यार्थ्यांची सुटका

दुष्काळी तालुक्यांतील विद्यार्थ्यांना शैक्षणिक खर्चाचा अतिरिक्त भार सहन करावा लागू नये, यासाठी परीक्षा शुल्क सरसकट माफ करण्याचे निर्देश देण्यात आले आहेत. या निर्णयासाठी कोणतेही निकष लावले जाणार नसल्याचे मुख्यमंत्र्यांनी स्पष्ट केले.

चारा खरेदीसाठी शासनाचा पुढाकार

जनावरांसाठी चाऱ्याची टंचाई निर्माण होऊ नये, यासाठी उपलब्ध पाण्याच्या ठिकाणी चारा पिकांची लागवड करण्याचे नियोजन केले जात आहे. रब्बी हंगामात ज्वारीसारख्या चारा पिकांना प्रोत्साहन देण्याबरोबरच शेतकऱ्यांनी उत्पादित केलेला चारा शासन हमीभावाने खरेदी करणार आहे.

पिण्याच्या पाण्याची उपलब्धता टिकवण्यासाठी अवैध पाणीउपशाविरोधातही कारवाई सुरू आहे. या संदर्भात १६ हजार वीजजोडण्या तोडण्यात आल्याची माहिती फडणवीस यांनी दिली. दुष्काळाच्या संकटात शेतकरी, विद्यार्थी आणि पशुधनाला दिलासा देण्यासाठी या उपाययोजना महत्त्वाच्या ठरणार आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/CF89MLzjXiJLRGIbwDr7te

*जाहिरातीसाठी_संपर्क करा 8329014805*