ghrushneshwar-temple-mahashivratri-crowd-chaos
छत्रपती संभाजीनगरातील घृष्णेश्वर मंदिरात महाशिवरात्री निमित्त हजारो शिवभक्तांनी गर्दी केली आहे. पहाटेपासूनच मंदिराच्या गाभाऱ्यात दर्शनासाठी मोठ्या रांगा लागल्या असून, संपूर्ण परिसर ‘हर हर महादेव’ च्या जयघोषाने दुमदुमला आहे.
महाशिवरात्रीचा पवित्र दिवस असल्याने देशभरातून शिवभक्त दर्शनासाठी आले आहेत. मात्र, प्रशासनाच्या ढिसाळ नियोजनामुळे मंदिर परिसरात गोंधळाचे वातावरण पाहायला मिळाले. दर्शनाच्या रांगेत पुढे जाण्यासाठी काही भाविकांनी एकमेकांना ढकलले, ज्यामुळे वाद निर्माण झाला. या वादाचे रूपांतर हाणामारीत झाले, आणि काही भाविकांनी लाथाबुक्क्यांचा मारा केला. या घटनेचा व्हिडीओ सोशल मीडियावर वेगाने व्हायरल होत आहे.
याच वेळी, विरोधी पक्षनेते अंबादास दानवे आपल्या कुटुंबासोबत व्हीआयपी दर्शनासाठी मंदिरात दाखल झाले. मात्र, सार्वजनिक रांगेतील काही भाविकांनी बॅरिकेड्स ओलांडून त्यांच्या मागे प्रवेश करण्याचा प्रयत्न केला. त्यामुळे दर्शनव्यवस्थेत आणखी गोंधळ उडाला. परिणामी, दानवे यांनी दर्शन न घेता माघार घेतली आणि काही वेळ बाहेर थांबले.
या घटनेनंतर अंबादास दानवे यांनी प्रशासनाच्या नियोजनावर जोरदार टीका केली. “दर्शनासाठी आलेल्या हजारो भाविकांची गैरसोय होत आहे. पोलीस आणि प्रशासनाने योग्य समन्वय साधून व्यवस्था लवकर सुधारावी,” अशी प्रतिक्रिया त्यांनी दिली.
घृष्णेश्वर हे देशातील बारावे ज्योतिर्लिंग असून, चार धाम आणि १२ ज्योतिर्लिंग यात्रा पूर्ण करण्यासाठी येथे दर्शन घेणे महत्त्वाचे मानले जाते. त्यामुळे भाविकांची संख्या मोठी आहे. महाशिवरात्री निमित्त मंदिरात भाविकांचा उत्साह ओसंडून वाहत आहे, मात्र प्रशासनाने गर्दी नियंत्रणासाठी अधिक चांगल्या उपाययोजना कराव्यात, अशी मागणी शिवभक्तांनी केली आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Br29avqYAlRCU4ytjYm4PJ
*जाहिरातीसाठी_संपर्क करा 8329014805*