🚍 पूरग्रस्त महाराष्ट्राला दिलासा : एसटीची १० टक्के भाडेवाढ रद्द

महाराष्ट्र सरकारने नागरिकांना मोठा दिलासा देणारा निर्णय घेतला आहे. राज्य परिवहन महामंडळाकडून (एसटी महामंडळ) दरवर्षीप्रमाणे दिवाळीच्या काळात करण्यात आलेली १० टक्के हंगामी भाडेवाढ यंदा रद्द करण्यात आली आहे. त्यामुळे सणासुदीच्या दिवसांत प्रवास करणाऱ्या नागरिकांना मोठा दिलासा मिळणार आहे.

मंगळवारी एसटी महामंडळाने १५ ऑक्टोबर ते ५ नोव्हेंबर या कालावधीत भाडेवाढ लागू करण्याचा निर्णय घेतला होता. या निर्णयामुळे ग्रामीण भागातील प्रवाशांमध्ये तीव्र नाराजी होती. अतिवृष्टी आणि पूरस्थितीमुळे ग्रामीण भागातील शेतकरी आणि सामान्य जनतेवर आधीच मोठे आर्थिक संकट आले आहे. कुणाचे घर, शेती, जनावरे यांचे प्रचंड नुकसान झाले आहे. अशा परिस्थितीत भाडेवाढ केल्याने नागरिकांवरील ताण वाढणार असल्याची भावना होती.

या पार्श्वभूमीवर उपमुख्यमंत्री एकनाथ शिंदे यांनी परिवहन मंत्री प्रताप सरनाईक यांना भाडेवाढ तात्काळ रद्द करण्याचे निर्देश दिले. शिंदे म्हणाले की, “दरवर्षी दिवाळीच्या काळात एसटी महामंडळ १० टक्के भाडेवाढ करते आणि यातून साधारणपणे ३० कोटी रुपयांचा महसूल मिळतो. मात्र यंदा राज्यातील पूरग्रस्त परिस्थिती लक्षात घेता अपवाद म्हणून हा निर्णय रद्द करण्यात आला आहे.”

परिवहन मंत्री प्रताप सरनाईक यांनी शिंदे यांच्या सूचनेनंतर भाडेवाढ मागे घेण्याचे आदेश दिले आहेत. त्यामुळे दिवाळीत मोठ्या प्रमाणावर होणाऱ्या एसटी प्रवासात प्रवाशांना नेहमीच्या दरात तिकिटे मिळतील. ग्रामीण भागात लालपरी हीच नागरिकांची प्रमुख वाहतूक व्यवस्था असल्याने या निर्णयाचे स्वागत होत आहे.

सणासुदीच्या काळात नागरिकांवर आर्थिक ओझे नको या उद्देशाने सरकारने घेतलेला हा निर्णय पूरग्रस्त आणि सर्वसामान्यांसाठी दिलासादायक ठरला आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/Ii8cI59VTTI77JxAW1zpnq?mode=ems_copy_t

*जाहिरातीसाठी_संपर्क करा 8329014805*