छत्रपती संभाजीनगर : शहरात सध्या कडाक्याची थंडी जाणवत असली, तरी महापालिका निवडणुकीच्या प्रचारामुळे राजकीय वातावरण मात्र चांगलेच तापले आहे. पहाटेपासूनच गारठा वाढलेला असतानाही उमेदवार, कार्यकर्ते आणि नेते प्रचारासाठी रस्त्यावर उतरल्याचे चित्र सर्वत्र पाहायला मिळत आहे. थंडीपासून बचावासाठी अनेकांच्या गळ्यात मफलर, डोक्यावर टोपी तर काहीजण जॅकेटमध्ये गुंडाळलेले दिसत आहेत. हुडहुडी भरवणाऱ्या थंडीतही प्रचार फेऱ्या, पदयात्रा, कॉर्नर सभा आणि घरोघरी भेटी सुरू असून निवडणुकीचा जोर कमी झालेला नाही.
गेल्या काही दिवसांत किमान तापमान १० अंशांच्या आसपास घसरले आहे. त्यामुळे सकाळी आणि रात्री थंडीचा कडाका अधिक जाणवत आहे. हवामान खात्याने पुढील काही दिवस थंडी कायम राहण्याचा अंदाज वर्तवला असला, तरी त्याचा प्रचारावर फारसा परिणाम झालेला दिसून येत नाही. उलट उमेदवार सकाळी लवकरच घराबाहेर पडत असून, दुपारनंतर आणि संध्याकाळच्या वेळीही प्रचाराचा वेग वाढवताना दिसत आहेत. विशेषतः संध्याकाळच्या सभांना नागरिकांची मोठी गर्दी होत आहे.
प्रत्येक प्रभागात चुरशीची लढत असल्याने उमेदवार एकही संधी सोडण्याच्या मनस्थितीत नाहीत. थंडी वाढली असली तरी प्रचारातील शब्दयुद्धाने राजकीय आखाडा तापलेला आहे. आरोप-प्रत्यारोप, विकासाचे दावे, मागील कारभारावर टीका आणि भविष्यातील स्वप्नांची आश्वासने यावर प्रचाराची धार अधिक तीव्र झाल्याचे पाहायला मिळत आहे. चौकाचौकांत आणि चहाच्या टपऱ्यांवर निवडणुकीचे गणित रंगताना दिसत असून, मतदारांमध्ये राजकीय चर्चांना उधाण आले आहे.
दरम्यान, थंडीतही प्रचारस्थळे गजबजलेली दिसत असून कार्यकर्त्यांसाठी गरम चहा हीच मोठी ऊब ठरत आहे. हातात चहाचे कप घेऊन प्रचाराची रणनीती आखताना कार्यकर्ते दिसत आहेत. कडाक्याच्या थंडीतही मतदारांपर्यंत पोहोचण्यासाठी उमेदवार कसोशीने प्रयत्न करत असल्याने शहरातील राजकीय वातावरण अधिकच तापल्याचे चित्र आहे. हवामान आणि राजकारण यांची ही अनोखी सांगड सध्या शहरात चर्चेचा विषय ठरत आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Kj1Sby1ZThs6fOYPl7g8RY
*जाहिरातीसाठी_संपर्क करा 8329014805*