छत्रपती संभाजीनगर : शहराजवळ असलेल्या वाळूज महानगर परिसरात पुन्हा एकदा गुन्हेगारीची धक्कादायक घटना समोर आली आहे. वडगाव कोल्हाटी येथे करण गायकवाड या तरुणावर अज्ञात व्यक्तीकडून धारदार चाकूने भीषण हल्ला करण्यात आला. या घटनेमुळे संपूर्ण परिसरात खळबळ उडाली असून नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, करण गायकवाड हा आपल्या कामानिमित्त बाहेर असताना अचानक हल्लेखोराने त्याच्यावर चाकूने वार केले. हल्ला इतका तीव्र होता की घटनास्थळी मोठ्या प्रमाणात रक्त सांडले होते. परिसरातील नागरिकांनी तत्काळ मदतीसाठी धाव घेतली. जखमी अवस्थेत करणला त्याच्या मामाने तातडीने शासकीय घाटी रुग्णालयात दाखल केले. सध्या त्याच्यावर उपचार सुरू असून त्याची प्रकृती गंभीर असल्याचे डॉक्टरांनी सांगितले आहे.
दरम्यान, हल्ला केल्यानंतर आरोपी घटनास्थळावरून पसार झाला असून वाळूज एमआयडीसी पोलीस ठाण्याचे पथक त्याचा शोध घेत आहे. घटनास्थळी पोलीसांनी पाहणी करून पुरावे गोळा केले असून सीसीटीव्ही फुटेजचीही तपासणी सुरू आहे. या हल्ल्यामागील कारण अद्याप स्पष्ट झाले नसले तरी जुना वाद किंवा वैयक्तिक शत्रुत्वाची शक्यता वर्तवली जात आहे.
या घटनेमुळे वडगाव कोल्हाटी परिसरात तणावाचे वातावरण असून नागरिकांनी सुरक्षेची मागणी केली आहे. पोलीस प्रशासनाने लवकरात लवकर आरोपीला अटक करून घटनेमागील सत्य समोर आणण्याचे आश्वासन दिले आहे. पुढील तपास सुरू आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/IFiUHSaNdeRHc992rS9iqG?mode=gi_t
*जाहिरातीसाठी_संपर्क करा 8329014805*