💍 वऱ्हाडीच्या वेशात चोराची एन्ट्री! नवरीचे गंठण आणि रोकड लंपास; संपूर्ण प्रकार CCTV मध्ये कैद 🚨

छत्रपती संभाजीनगर : शहरात लग्नसराईच्या पार्श्वभूमीवर चोरीच्या घटनांमध्ये चिंताजनक वाढ होत असल्याचे चित्र समोर आले आहे. वऱ्हाडी बनून आलेल्या एका चोरट्याने नवरीची बॅग लंपास करत त्यातील दागिने आणि रोकड चोरून नेल्याची धक्कादायक घटना गारखेडा परिसरातील तिरुमला मंगल कार्यालय येथे घडली. या प्रकरणी पुंडलिकनगर पोलिस ठाण्यात अज्ञात चोरट्याविरोधात गुन्हा दाखल करण्यात आला असून पोलिस पुढील तपास करत आहेत.

 

नाशिकच्या सातपूर परिसरातील रितेश भोसले (२५) हे आपल्या मावस बहिणीच्या लग्नासाठी कुटुंबासह शहरात आले होते. १ मे रोजी हळदीचा कार्यक्रम पार पडला. कार्यक्रमानंतर दुपारी साडेबारा वाजताच्या सुमारास त्यांनी नवरीची बॅग दुसऱ्या मजल्यावरील खोलीत ठेवली होती. याच संधीचा फायदा घेत अज्ञात चोरट्याने वऱ्हाडी असल्याचा बनाव करत खोलीत प्रवेश केला आणि बॅगेतील सुमारे एक तोळ्याचे सोन्याचे गंठण व १८ हजार ७०० रुपयांची रोकड लंपास केली. काही वेळाने कुटुंबीयांनी बॅग तपासली असता चोरीचा प्रकार उघडकीस आला.

दरम्यान, शहरात इतर ठिकाणीही चोरीच्या घटना घडल्या आहेत. लोटाकारंजा येथे सवत ताहेरा बेगम हिने घरातून १० तोळे सोने चोरल्याचा प्रकार समोर आला असून याप्रकरणी सिटी चौक पोलिस ठाण्यात गुन्हा दाखल झाला आहे. तसेच शतपावली करत असताना सुरेखा जगताप यांच्या गळ्यातील सव्वादोन तोळ्याचे गंठण दुचाकीवरील चोरट्यांनी हिसकावून नेले असून एमआयडीसी वाळूज पोलिस ठाण्यात गुन्हा नोंदविण्यात आला आहे. कांचनवाडी भागात माया वायकर यांच्या घरातून दोन तोळे सोन्याचे दागिने चोरीला गेल्याची घटना घडली असून सातारा पोलिस ठाण्यात गुन्हा दाखल करण्यात आला आहे.

लग्नसराईच्या हंगामात चोरटे सक्रिय झाल्याचे स्पष्ट होत असून नागरिकांनी मौल्यवान वस्तूंची विशेष काळजी घ्यावी, असे आवाहन पोलिसांकडून करण्यात आले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IFiUHSaNdeRHc992rS9iqG?mode=gi_t

*जाहिरातीसाठी_संपर्क करा 8329014805*