🔴 भिंत फोडून दुकानात चोरी; 12 तासांत पोलिसांची धडक कारवाई, दोन आरोपी जेरबंद

छत्रपती संभाजीनगर : शहरातील मोंढा नाका परिसरात घडलेल्या एका धाडसी चोरीप्रकरणाचा पोलिसांनी अवघ्या काही तासांत पर्दाफाश करत मोठे यश मिळवले आहे. मध्यरात्रीच्या सुमारास दर्शन हार्डवेअर दुकानाला लक्ष्य करत चोरट्यांनी दुकानाच्या मागील भिंतीला भगदाड पाडले आणि आत प्रवेश केला. अत्यंत नियोजनबद्ध पद्धतीने हार्डवेअर साहित्य चोरी करून आरोपी रिक्षाच्या साहाय्याने पसार झाले. या प्रकारामुळे परिसरात काही काळ भीतीचे वातावरण निर्माण झाले होते.

घटनेची माहिती मिळताच जवाहरनगर पोलीस स्टेशनने तातडीने तपासाची सूत्रे हाती घेतली. बीट मार्शल पथक, सीसीटीव्ही फुटेज, तसेच सायबर सेलच्या मदतीने आरोपींचा माग काढण्यात आला. गुप्त माहितीच्या आधारे पोलिसांनी अवघ्या 12 तासांत कारवाई करत दोन सराईत आरोपींना जेरबंद केले. फारुख अहमद खान (वय 20) आणि शेख फिरोज शेख युनूस (वय 26) अशी अटक करण्यात आलेल्या आरोपींची नावे आहेत. याशिवाय चोरीचा माल खरेदी करणारा अझरुद्दीन अब्दुल खैरखान यालाही ताब्यात घेण्यात आले आहे.

पोलिसांनी आरोपींकडून चोरीतील तब्बल 5 लाख 6 हजार 600 रुपयांचा मुद्देमाल जप्त केला आहे. तपासादरम्यान आरोपींनी यापूर्वीही जवाहरनगर पोलीस ठाणे हद्दीत पाच चोरीच्या घटनांमध्ये सहभाग असल्याची कबुली दिली. या कारवाईमुळे परिसरात सुरू असलेल्या मालिका चोरींचा उलगडा झाला असून नागरिकांनी समाधान व्यक्त केले आहे.

ही संपूर्ण कारवाई पोलीस आयुक्त प्रवीण पवार, पोलीस उपआयुक्त प्रशांत स्वामी, सहाय्यक पोलीस आयुक्त मनीष कल्याणकर आणि वरिष्ठ पोलीस निरीक्षक सचिन कुंभार यांच्या मार्गदर्शनाखाली पार पडली. पोह. अनिल भाले आणि पोअं. मारोती गोरे यांच्या पथकाने ही धडक कारवाई यशस्वी केली.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IFiUHSaNdeRHc992rS9iqG?mode=gi_t

*जाहिरातीसाठी_संपर्क करा 8329014805*