🔴 गुलमंडीतील दोन ड्रायफ्रूट दुकानांवर चोरट्यांचा डाव; अंतर्गत मार्गाने दुकानात प्रवेश करत अडीच लाखांचा ऐवज लंपास

छत्रपती संभाजीनगर : गुलमंडी परिसरात मध्यरात्री अज्ञात चोरट्यांनी ड्रायफ्रूट्सच्या दोन दुकानांवर डल्ला मारत तब्बल २ लाख ५० हजार रुपयांची रोकड, ५ ग्रॅम सोन्याची अंगठी आणि २०० ग्रॅम चांदीची बेडी (पैंजण) असा ऐवज चोरून नेल्याची घटना उघडकीस आली आहे. ही चोरी १३ ते १४ मेदरम्यान गुलमंडी येथील दीपक ट्रेडर्स आणि न्यू दीपक ट्रेडर्स या दुकानांमध्ये घडली. या प्रकरणी सिटी चौक पोलिस ठाण्यात गुन्हा दाखल करण्यात आला असून पोलिसांनी तपास सुरू केला आहे.

फिर्यादी व्यापारी दीपक बादशहा (वय ६९) यांचे गुलमंडी पार्किंगसमोर दीपक ट्रेडर्स नावाचे ड्रायफ्रूट्सचे दुकान आहे. त्यांच्या शेजारीच त्यांचे पुतणे हर्षद नवीनचंद्र बादशहा यांचे न्यू दीपक ट्रेडर्स हे दुकान आहे. बुधवारी रात्री दोघांनी नेहमीप्रमाणे दुकाने बंद करून घरी प्रस्थान केले होते. मात्र मध्यरात्री अज्ञात चोरट्यांनी दोन्ही दुकानांमध्ये प्रवेश करून चोरी केली.

चोरट्यांनी दीपक ट्रेडर्समधून १ लाख रुपयांची रोकड, ५ ग्रॅम सोन्याची अंगठी आणि २०० ग्रॅम चांदीची बेडी चोरली, तर न्यू दीपक ट्रेडर्समधून दीड लाख रुपयांची रोकड लंपास केली. गुरुवारी पहाटे ५.२० वाजण्याच्या सुमारास शेजारील मेडिकल दुकानाचे मालक खटोड यांनी हर्षद बादशहा यांना फोन करून दुकानाचे शटर अर्धवट उघडे असल्याची माहिती दिली. त्यानंतर व्यापाऱ्यांनी दुकानात धाव घेतली असता दोन्ही दुकानांतील ड्रॉवर तोडण्यात आल्याचे आणि रोकड गायब असल्याचे दिसून आले.

या चोरीतील विशेष बाब म्हणजे चोरट्यांनी अत्यंत शिताफीने आणि नियोजनबद्ध पद्धतीने चोरी केली. त्यांनी आधी न्यू दीपक ट्रेडर्सचे शटर उचकटून आत प्रवेश केला आणि तेथून अंतर्गत मार्गाने दीपक ट्रेडर्समध्ये प्रवेश केला. दुकानांच्या अंतर्गत रचनेची आणि रोकड ठेवण्याच्या ठिकाणाची अचूक माहिती चोरट्यांना असल्याने ही चोरी एखाद्या माहीतगाराच्या मदतीने झाल्याचा संशय व्यक्त केला जात आहे. पोलिसांकडून परिसरातील सीसीटीव्ही फुटेज तपासले जात असून पुढील तपास सुरू आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*