🚨 शेअर मार्केटमध्ये दुप्पट-तिप्पट नफ्याचे आमिष; महिला दंतवैद्याला ४.५२ कोटींचा सायबर गंडा

छत्रपती संभाजीनगर : शहरात सायबर फसवणुकीची धक्कादायक घटना उघडकीस आली असून, शेअर मार्केटमध्ये अल्पावधीत दुप्पट-तिप्पट नफा मिळवून देण्याचे आमिष दाखवत सायबर चोरट्यांनी एका ४५ वर्षीय महिला दंतवैद्याची तब्बल ४ कोटी ५२ लाख रुपयांची फसवणूक केली आहे. ही घटना ९ मे ते २७ मे दरम्यान गारखेडा परिसरातील सूतगिरणी चौक येथे घडली. याप्रकरणी पुंडलिकनगर पोलीस ठाण्यात व्हॉट्सअॅप ग्रुपच्या अॅडमिनसह इतर संशयितांविरुद्ध गुन्हा दाखल करण्यात आला आहे.

मिळालेल्या माहितीनुसार, संबंधित महिला डॉक्टर तीन आठवड्यांपूर्वी व्हॉट्सअॅपवरील ‘झेड ९९ एचएसबीसी ग्रुप स्टॉक रिसर्च इन्स्टिट्यूट’ या ग्रुपमध्ये सहभागी झाल्या होत्या. ग्रुपमधील अॅडमिन आणि सदस्यांनी त्यांना शेअर बाजारातील गुंतवणुकीतून मोठा नफा मिळवून देण्याचे आश्वासन दिले. त्यांच्या सांगण्यावरून डॉक्टरांनी एका ऑनलाइन इन्व्हेस्टमेंट पोर्टलवर खाते तयार केले आणि वेळोवेळी आरटीजीएसद्वारे ४ कोटी ५२ लाख रुपये विविध खात्यांमध्ये जमा केले.

फसवणूक करणाऱ्यांनी बनावट पोर्टलवर गुंतवलेली रक्कम चारपट झाल्याचे दाखवले. मात्र पैसे परत काढण्याचा प्रयत्न केल्यावर विविध कारणे सांगून टाळाटाळ करण्यात आली. संशय वाढल्यानंतर डॉक्टरांच्या पतीने १ जून रोजी राष्ट्रीय सायबर गुन्हे हेल्पलाइन १९३० वर तक्रार दाखल केली.

तपासादरम्यान सायबर पोलिसांनी तत्पर कारवाई करत फसवलेल्या रकमेपैकी १ कोटी १५ लाख रुपये गोठवण्यात यश मिळवले आहे. ही रक्कम गुजरात आणि झारखंडमधील बँक खात्यांमध्ये वळवण्यात आल्याचे निष्पन्न झाले आहे. तसेच या गुन्ह्याचे धागेदोरे कंबोडियासह अन्य देशांपर्यंत पोहोचत असल्याचे तपासातून समोर आले असून, पुढील तपास पोलीस निरीक्षक अशोक भंडारे करत आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*