पैठण तालुक्यातील पाचोड येथे भरदिवसा अज्ञात चोरट्याने कारची काच फोडून तब्बल १ लाख १० हजार रुपये रोख रक्कम लंपास केल्याची घटना घडली आहे. गुरुवारी दुपारी घडलेल्या या घटनेमुळे परिसरात मोठी खळबळ उडाली आहे.
प्राप्त माहितीनुसार, काशिनाथ बाबुराव हिंगले (रा. लिमगाव, ता. पैठण) यांनी घरगुती कारणासाठी बुलढाणा अर्बन बँकेच्या पाचोड शाखेत सोन्याचे दागिने तारण ठेवून १.१० लाख रुपये रोख घेतले. त्यांनी ही रक्कम आपल्या कारमध्ये ठेवून मित्राच्या कामासाठी एस.बी.आय. बँकेत गेले असता ही संधी साधून अज्ञात चोरट्याने कारची काच फोडली आणि वाहनातील रोख रक्कम चोरून नेली.
घटनेची माहिती मिळताच पाचोड पोलीस ठाण्याचे सहाय्यक पोलीस निरीक्षक शरदचंद्र रोडगे यांनी घटनास्थळी धाव घेत तपास सुरू केला आहे. तसेच, पैठणचे उपविभागीय पोलिस अधिकारी डॉ. सिद्धेश्वर भोरे यांनीही घटनास्थळी भेट देऊन गुन्हेगाराला लवकरात लवकर अटक करण्याच्या सूचना दिल्या आहेत.
सध्या पाचोड पोलीस ठाण्यात या घटनेची तक्रार दाखल करण्यात आली असून, पोलिसांकडून परिसरातील सीसीटीव्ही फुटेज आणि इतर पुरावे तपासले जात आहेत. या घटनेमुळे नागरिकांमध्ये भीतीचे वातावरण असून, पोलिसांनी लवकरात लवकर आरोपीला पकडावे, अशी मागणी स्थानिक नागरिकांनी केली आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/EatQ9jy0BXO4VEa0In93E6
*जाहिरातीसाठी_संपर्क करा 8329014805*