वाळूज : घरातील व्यक्ती देवीच्या दर्शनासाठी गेल्याची संधी साधत चोरट्यांनी बंद घर फोडून लाखो रुपये किंमतीच्या जुन्या नोटा व चांदीच्या नाण्यांवर डल्ला मारला. ही घटना सोमवारी (दि.१७) रात्री उघडकीस आली.
तारादेवी इंदरचंद मुथा (वय ७५) या त्यांची मुलगी डॉ. मोनिका मुथा व नातीसोबत सिडको वाळूज महानगर-१ मधील माऊली नगरात राहतात. त्या १५ मार्च रोजी पहाटे देवीच्या दर्शनासाठी राजस्थानमधील जोधपूरला गेल्या होत्या. सोमवारी रात्री घरी परतल्यानंतर त्यांना घराचे कुलूप तोडलेले दिसले.
घरात प्रवेश करताच सर्व सामान अस्ताव्यस्त पडलेले होते. त्यांनी कपाट उघडून पाहिले असता तारादेवी यांच्या पतीने संग्रहित केलेल्या लाखो रुपये किंमतीच्या जुन्या नोटा आणि नाणी गायब असल्याचे आढळले.
दुर्मिळ नोटा आणि नाणी चोरीला
चोरट्यांनी कपाटातील दुर्मिळ व ऐतिहासिक चलन लंपास केले, ज्यामध्ये –
- आरबीआय गव्हर्नर अय्यंगर, एस. जगन्नाथन्, नरसिंह राय आणि बी. रामाराव यांच्या स्वाक्षरीच्या ५ रु., १० रु., १०० रु. आणि १००० रु. च्या जुन्या नोटा
- १, २ व ५ रुपयांच्या दुर्मिळ नोटांचे सेट आणि ५०० ते ६०० जुन्या भारतीय नोटा
- १९३९, १९५४ आणि १९७० मधील ऐतिहासिक चांदीची नाणी
- ब्रिटिश ईस्ट इंडिया कंपनीची नाणी, अकबरचे १० नाणी, पंचम् जॉर्ज आणि अडवर्डचे नाणे
- मिक्स सिल्व्हरचे २५० क्वाईन, सोन्याच्या कानातील रिंगा आणि रोख ६ हजार रुपये
पोलिस तपास सुरू
सहाय्यक पोलीस निरीक्षक संजय गीते यांनी घटनास्थळी भेट देऊन ठसे तज्ञांच्या मदतीने तपास सुरू केला आहे. तारादेवी मुथा यांनी दिलेल्या तक्रारीवरून एमआयडीसी वाळूज पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
पोलिसांनी घराच्या आसपासच्या सीसीटीव्ही फुटेजची तपासणी सुरू केली असून, नागरिकांना घरातील मौल्यवान वस्तूंची विशेष काळजी घेण्याचे आवाहन केले आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Br29avqYAlRCU4ytjYm4PJ
*जाहिरातीसाठी_संपर्क करा 8329014805*