🏠 “चोरटे घरात शिरले, काहीही नाही सापडले; थकून एक ग्लास पाणी पिऊन निघाले” 🏠

छत्रपती संभाजीनगर : शहरातील सातारा परिसरातील सुधाकरनगर भागात चोरटे अक्षरशः दहशत माजवत आहेत. महिनाभरात तब्बल चार चोरीच्या घटना घडल्या असून पोलिसांची रात्रगस्त कुठेच दिसत नसल्याने चोरट्यांची हिम्मत वाढत आहे. सोमवारी (दि. २२) पहाटे घडलेल्या घटनेने नागरिकांत भीतीचे वातावरण निर्माण झाले आहे. यावेळी निवृत्त पोलिस अधिकाऱ्याच्या घरात दोन चोरटे घुसले. त्यांनी घरातील खिडकी व कुलूप फोडून कपाटांची उचकापाचक केली. मात्र, गव्हाणे कुटुंब मौल्यवान वस्तू घेऊन गावी गेले असल्याने चोरट्यांच्या हाती काहीच लागले नाही. परंतु, जाताजाता चोरट्यांनी घरातले पाणी पिऊन गेल्याचे तक्रारदार यांनी यावेळी सांगितल्याने ही बाब परिसरात चर्चेचा विषय ठरली आहे.

सुधाकरनगर येथील निवृत्त सहाय्यक उपनिरीक्षक गोपीचंद गव्हाणे हे आपल्या कुटुंबासह गावी गेले होते. याच संधीचा फायदा घेत पहाटे ३.५२ वाजता दोन चोरटे घरात घुसले. टॉमीच्या सहाय्याने खिडकी व कुलूप तोडून घरातील कपाटे फोडली. मात्र, काहीच मिळाले नाही. अखेर रिकाम्या हाताने जाण्याआधी चोरट्यांनी घरातले पाणी पिऊन तहान भागवली. चोरीच्या प्रयत्नानंतर चोरट्यांनी “पाणी पिऊनच समाधान मानले” असे म्हणावे लागेल, अशी नागरिकांमध्ये खिल्ली उडवली जात आहे.

या घटनेची तक्रार योगेश गव्हाणे यांनी सातारा पोलिस ठाण्यात दिली. परंतु, पोलिसांनी “घरातून काहीच चोरीस गेले नाही” असे सांगत गुन्हा दाखल न करता केवळ तक्रार अर्ज घेतल्याचे समोर आले आहे. सीसीटीव्हीत चोरटे कैद असूनही पोलिसांचा निष्क्रियपणा पाहून परिसरातील नागरिक संतप्त आहेत. दोन वर्षांपूर्वीही गव्हाणे यांच्या घरात चोरीचा प्रयत्न झाला होता. त्या वेळी अॅड. मयूर गव्हाणे यांनी धैर्य दाखवत चोरट्यांचा पाठलाग केला होता. मात्र, अंधाराचा फायदा घेत ते पसार झाले होते.

फक्त घरफोडीच नव्हे तर परिसरात दुचाकी चोरटेही सक्रिय झाले आहेत. साऊथ रिपब्लिक सोसायटीत मागील महिन्यात एसआरपीएफमधील संदीप जिरे व अतुल झोडगे यांच्या दुचाक्या चोरट्यांनी पळविल्या. त्या घटनाही सीसीटीव्हीत कैद असूनही पोलिसांनी एकाही आरोपीला पकडलेले नाही.

या सर्व घटनांमुळे सुधाकरनगर परिसरात नागरिकांच्या सुरक्षिततेचा प्रश्न पुन्हा ऐरणीवर आला आहे. चोरटे इतक्या बेधडकपणे घरफोड्या करत असताना आणि पोलिस फक्त कागदोपत्री कामगिरी करताना दिसत असल्याने नागरिकांमध्ये अस्वस्थता आहे. चोरांनी चोरी न करता पाणी पिऊन घरातून बाहेर पडल्याचा प्रसंग म्हणजे पोलिसांच्या हलगर्जीपणावरच पाणी फिरल्यासारखा असल्याचे नागरिक उपहासाने म्हणत आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KlbV2BdtEZ4Fbi6usVHmPo?mode=ems_copy_t

*जाहिरातीसाठी_संपर्क करा 8329014805*