🚨 नियंत्रण कक्षाला बॉम्बस्फोटाचा कॉल; तपासात माहिती खोटी असल्याचे उघड

छत्रपती संभाजीनगर : शहर पोलिस दलाच्या नियंत्रण कक्षाला गुरुवारी (दि. ६) दुपारी प्राप्त झालेल्या एका संशयास्पद फोन कॉलने शहराची कायदा-सुव्यवस्था यंत्रणा काही काळासाठी अलर्ट मोडवर गेली होती. दुपारी बारा वाजण्याच्या सुमारास नियंत्रण कक्षाच्या लँडलाईनवर आलेल्या कॉलमध्ये, “औरंगाबाद के मशिदो में कुछ लोग बॉम्ब ब्लास्ट करने वाले हैं,” असे सांगण्यात आले होते. या गंभीर माहितीने पोलिस तात्काळ सतर्क झाले आणि कॉल करणाऱ्या व्यक्तीचा शोध सुरू करण्यात आला.

सदर कॉल करणारी व्यक्ती शेख सलीम शेख चांद पाशा (३५, रा. मनियार गल्ली, अंबाजोगाई, जि. बीड) असल्याचे समोर आले. प्राथमिक तपासात तो मनोरुग्ण असून मानसिक उपचार घेत असल्याचे निष्पन्न झाले. तथापि, अशा प्रकारे अफवा पसरवून धार्मिक तेढ निर्माण करण्याचा प्रयत्न केल्याबद्दल त्याच्यावर कायदेशीर कारवाई करण्यात आली आहे.

घटनेबाबत अधिक माहिती अशी की, पोलिस उपनिरीक्षक अश्फाक मुश्ताक शेख हे नियंत्रण कक्षात कर्तव्यावर असताना हा कॉल आला. परिस्थितीची गंभीरता लक्षात घेऊन त्यांनी तात्काळ बीड पोलिसांशी संपर्क साधून कॉल करणाऱ्याचा तपशील मागविला. सायबर पोलिस ठाण्याचे निरीक्षक सोमनाथ जाधव यांनी अंबाजोगाई ठाण्याचे निरीक्षक जोगदंड यांना आरोपीचा लोकेशन तपासण्यासाठी मदत केली. त्यानंतर आरोपीचा शोध घेऊन विचारपूस करण्यात आली असता त्याने दिलेली माहिती खोटी असल्याचे स्पष्ट झाले.

पोलिसांनी या प्रकरणात तत्परता दाखवत आरोपीला ताब्यात घेऊन बेगमपुरा पोलिस ठाण्यात गुन्हा दाखल केला आहे. आरोपी मानसिक आजाराने त्रस्त असला तरी त्याने पसरविलेल्या चुकीच्या माहितीमुळे समाजातील शांतता व कायदा-सुव्यवस्थेवर परिणाम होऊ शकला असता. त्यामुळे कायद्याने योग्य ती कारवाई करण्यात आल्याचे पोलिस निरीक्षक मंगेश जगताप यांनी सांगितले.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/HECW4lJo5J4AfPZGuYcj4E?mode=wwt

*जाहिरातीसाठी_संपर्क करा 8329014805*