🗳️ महापालिकेत गटनेते निश्चित : शिंदेसेनेत त्र्यंबक तुपे, उद्धवसेनेत गणेश लोखंडे यांची निवड

छत्रपती संभाजीनगर :  महानगरपालिकेत सत्तास्थापनेच्या हालचालींना वेग आला असून विविध राजकीय गटांनी आपापले गटनेते निश्चित करण्याची प्रक्रिया पूर्ण केली आहे. आगामी महापौर व उपमहापौर निवडणुकीच्या पार्श्वभूमीवर पक्षांतर्गत हालचाली वाढल्या असून राजकीय समीकरणे स्पष्ट होताना दिसत आहेत.

शिंदेसेनेच्या नगरसेवकांनी माजी महापौर त्र्यंबक तुपे यांची गटनेतेपदी निवड केली आहे. पालकमंत्री संजय शिरसाट यांच्या निवासस्थानी शुक्रवारी झालेल्या बैठकीत हा महत्त्वपूर्ण निर्णय घेण्यात आला. शिंदेसेनेच्या एकूण १३ नगरसेवकांपैकी ९ नगरसेवक या बैठकीला उपस्थित होते. महापालिका निवडणुकीनंतर नियमानुसार ३० दिवसांच्या आत गटनिहाय नोंदणी करणे आवश्यक असल्याने काल शिंदेसेनेच्या नगरसेवकांनी विभागीय आयुक्त कार्यालयात त्यांच्या गटाची अधिकृत नोंदणी केली आहे.

दरम्यान, उद्धवसेनेच्या नगरसेवकांनीही आपला गटनेता निश्चित केला असून नगरसेवक गणेश लोखंडे यांची गटनेतेपदी निवड करण्यात आली आहे. विभागीय आयुक्त जितेंद्र पापळकर यांची भेट घेऊन आवश्यक कागदपत्रे सादर करण्यात आली असून ही निवड अधिकृतरीत्या महसूल आयुक्तांकडे नोंदविण्यात आली आहे. नेते अंबादास दानवे यांच्या मार्गदर्शनाखाली ही प्रक्रिया पार पडली.

या बैठकीस शहरप्रमुख बाळासाहेब थोरात, हरिभाऊ हिवाळे, दिग्विजय शेरखाने, ज्ञानेश्वर डांगे, रशीद मामू, सावित्री वाणी, सचिन खैरे, सुनीता सोनवणे, वैशाली कोरडे, हनुमान शिंदे व रामेश्वर कोरडे यांची उपस्थिती होती.

१० फेब्रुवारी रोजी महापौर आणि उपमहापौर पदासाठी निवडणूक होणार असून या पार्श्वभूमीवर गटनिहाय हालचाली निर्णायक ठरत आहेत. विविध पक्षांची रणनीती आणि संख्याबळ लक्षात घेता आगामी सत्तास्थापनेची दिशा लवकरच स्पष्ट होण्याची शक्यता आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IJbzVXxActY7zUsWoQ3lSr?mode=gi_t

*जाहिरातीसाठी_संपर्क करा 8329014805*