🌧️ काल सायंकाळी शहरात वादळी वाऱ्यासह ४.८ मिमी पावसाची नोंद; ६३ किमी वेगाच्या वाऱ्यांनी झाडे कोसळली, अनेक भागात वीजपुरवठा खंडित

छत्रपती संभाजीनगर :  शहर आणि परिसरात सोमवारी सायंकाळी अचानक हवामानात मोठा बदल झाला. दिवसभर उकाड्याने त्रस्त झालेल्या नागरिकांना सायंकाळी वादळी वाऱ्यासह झालेल्या जोरदार पावसाने काहीसा दिलासा मिळाला. मात्र या पावसामुळे अनेक ठिकाणी झाडे उन्मळून पडल्याने तसेच वीजपुरवठा खंडित झाल्याने नागरिकांची तारांबळ उडाली. हवामान विभागाच्या माहितीनुसार शहरात अवघ्या १५ ते २० मिनिटांत सुमारे ४.८ मिमी पावसाची नोंद झाली. तसेच ताशी ६३.३ किलोमीटर वेगाने वारे वाहिल्याची नोंद करण्यात आली.

वादळी पावसामुळे शहरातील अनेक भागांत रस्त्यांवर पाणी साचले होते. नांदराबाद परिसरात गारांचा पाऊसही पडल्याने नागरिकांमध्ये आश्चर्य व्यक्त करण्यात आले. जोरदार वाऱ्यामुळे अनेक ठिकाणी मोठमोठी झाडे रस्त्यावर कोसळली. छत्रपती संभाजीनगर ते अहिल्यानगर महामार्गावरील काही भागांत वाहतुकीचा वेग मंदावला होता. काही वाहनधारकांना बराच वेळ वाहतूक कोंडीत अडकून राहावे लागले.

गंगापूर तालुक्यातही पावसाने जोरदार हजेरी लावली. करमाड, चितेपिंपळगाव, शेंद्रा आणि परिसरात पावसाच्या जोरदार सरी कोसळल्या. करमाडच्या आठवडी बाजारात पाणी साचल्याने भाजी विक्रेत्यांचे नुकसान झाल्याचे समोर आले. लाडसावंगी परिसरात वादळी वाऱ्यामुळे वीजपुरवठा खंडित झाला होता. काही ठिकाणी शेतकऱ्यांच्या फळबागांचे नुकसान झाल्याची प्राथमिक माहिती मिळत आहे.

दरम्यान, अचानक आलेल्या पावसामुळे नागरिकांनी उष्णतेपासून दिलासा मिळाल्याची भावना व्यक्त केली. पुढील काही दिवस हवामानात बदल कायम राहण्याची शक्यता हवामान विभागाने वर्तवली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/I6kWaCT1EMB7py0eVHlGdl

*जाहिरातीसाठी_संपर्क करा 8329014805*