छत्रपती संभाजीनगर : केवळ ३० रुपयांच्या पेट्रोलवरून पेटलेला किरकोळ वाद गंभीर रूप धारण करत सोमवारी रात्री चिकलठाणा परिसरातील झाल्टा शिवारात एका पेट्रोल पंपावर टोळक्याने धडक देत दोन कर्मचाऱ्यांवर हल्ला केला. यावेळी आरोपींनी १ लाख ३७ हजार रुपयांची रोकडही लांबवली. याप्रकरणी बुधवारी चिकलठाणा पोलीस ठाण्यात गुन्हा दाखल करण्यात आला आहे.
या प्रकरणी भुरेखाँ बन्नेखाँ पठाण (३२, रा. झाल्टा) यांनी फिर्याद दिली आहे. त्यानुसार, १२ मे रोजी रात्री अकराच्या सुमारास तीन तरुण दुचाकीवरून शिवदत्त पेट्रोल पंपावर आले. त्यांनी ३० रुपयांचे पेट्रोल भरून घेतल्यानंतर ते पेट्रोल कमी दिल्याचा आरोप करत कर्मचाऱ्यांशी वाद घालू लागले. शिवीगाळ करत त्यांनी पैसे मागितले आणि झटापटीला सुरुवात झाली.
वाद वाढताच एका तरुणाने फोन करून ७ ते ८ साथीदारांना बोलावले. हे सर्वजण एकत्र येताच त्यांनी भुरेखाँ पठाण आणि त्यांच्या सहकाऱ्यांवर हल्ला चढवला. या मारहाणीत आरोपींनी पठाण यांच्या खिशातील ८२ हजार रुपये आणि बाळू खडके यांच्या खिशातील ५५ हजार रुपये असा एकूण १ लाख ३७ हजार रुपयांचा ऐवज लंपास केला. भांडण सोडवण्यासाठी आलेल्या मच्छिंद्र म्हस्के आणि किशोर घुगे यांनाही आरोपींनी मारहाण केली.
घटनेदरम्यान आरोपींपैकी एकाकडे कोयता असल्याचे निदर्शनास आले. तो कोयता घेऊन धावत येताना दिसताच सर्व कर्मचारी पंपाच्या मागील शेतात पळून गेले, असे फिर्यादीत नमूद करण्यात आले आहे.
या प्रकरणाचा तपास चिकलठाणा पोलीस ठाण्याचे उपनिरीक्षक नारायण राठोड करीत आहेत. परिसरात खळबळ उडवणाऱ्या या घटनेमुळे स्थानिकांमध्ये भीतीचे वातावरण आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/JWPLw3ii1wAKDICCoiRTdD
*जाहिरातीसाठी_संपर्क करा 8329014805*