💥 आर्थिक फायद्यासाठी शेतकऱ्याची ‘गांजा शेती’! सिल्लोड तालुक्यातील धक्कादायक प्रकार उघड

सिल्लोड तालुक्यातील पळशी शिवारात एका शेतकऱ्याने आर्थिक फायद्यासाठी बेकायदेशीर मार्ग स्वीकारत आपल्या शेतात गांजाची झाडे लावल्याचा धक्कादायक प्रकार उघडकीस आला आहे. सिल्लोड ग्रामीण पोलिसांनी गोपनीय माहितीच्या आधारे बुधवारी (दि.१५) रात्री छापा मारून तब्बल २ लाख ७९ हजार २०० रुपये किंमतीचा २९ किलो गांजा जप्त केला आहे.

सिल्लोड ग्रामीण पोलीस ठाण्याचे निरीक्षक रवींद्र ठाकरे यांना पळशी शिवारात गांजाची लागवड सुरू असल्याची माहिती मिळाल्यानंतर त्यांनी नायब तहसीलदार बोरकर, उपनिरीक्षक राजेंद्र बनकर आणि पथकासह रात्री १० वाजता छापा टाकला. तपासात चतरसिंग जालमसिंग जोनवाल या शेतकऱ्याने आपल्या शेतात गांजाची लागवड केल्याचे समोर आले. मात्र, पोलिसांच्या कारवाईची खबर मिळताच आरोपी अंधाराचा फायदा घेत पसार झाला.

पोलिसांनी घटनास्थळावरून १७ गांजाची झाडे, ओला-सुका गांजा आणि पाने-फुले असा मिळून २७.९२० किलो वजनाचा साठा जप्त केला. एकूण किंमत २ लाख ७९ हजार २०० रुपये एवढी असून, या प्रकरणी सिल्लोड ग्रामीण पोलिस ठाण्यात गुन्हा दाखल करण्यात आला आहे.

पोलीस निरीक्षक ठाकरे यांनी सांगितले की, “शेतीत कष्ट करून प्रगती करण्याऐवजी बेकायदेशीर अमली पदार्थांची लागवड करणे हे गंभीर गुन्हा आहे. केवळ आर्थिक फायद्यासाठी कायद्याचे उल्लंघन करणाऱ्यांना पोलिसांकडून कोणतीही सवलत दिली जाणार नाही.” दरम्यान, फरार आरोपीला लवकरच अटक करून न्यायालयात हजर करण्यात येईल, अशी माहिती पोलिसांनी दिली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IUr4T19zTCmAWLrpodS5ui?mode=ems_copy_t

*जाहिरातीसाठी_संपर्क करा 8329014805*