💥 वाळूज एमआयडीसी हादरली! वेल्डिंगदरम्यान ऑइल टँकरचा भीषण स्फोट; एका हॉटेल चालकाचा मृत्यू

छत्रपती संभाजीनगर  वाळूज एमआयडीसी औद्योगिक वसाहतीतील कामगार चौक परिसरात शुक्रवारी (दि. १७ ऑक्टोबर) दुपारी साडेतीनच्या सुमारास एक भीषण दुर्घटना घडली. फर्नेस ऑईलच्या टँकरमध्ये वेल्डिंगचे काम सुरू असताना अचानक आग लागली आणि प्रचंड स्फोट झाला. या दुर्घटनेत खानावळ चालकाचा मृत्यू झाला, तर एक युवक जखमी झाला आहे. या घटनेनंतर परिसरात दोन तास दहशतीचे वातावरण निर्माण झाले.

अभय एजन्सी या फर्नेस ऑईल व्यवसायिक संस्थेचा एमएच २० जीसी २०१५ क्रमांकाचा टँकर लिकेज झाल्याने त्याची वेल्डिंग करण्यासाठी चालक खंडू अनिल गवळी (वय ४०) आणि क्लिनर गजानन खरबडे ट्रक टर्मिनलजवळील वर्कशॉपमध्ये आले होते. सुमारे ३.४० वाजता वेल्डिंग सुरू असताना अचानक टँकरला आग लागली आणि क्षणार्धात प्रचंड स्फोट झाला.

स्फोटात शेजारील खानावळ चालक रफिक गोडन शेख (वय ५०, रा. साजापूर परिसर) यांच्या अंगावर टँकरचा लोखंडी भाग आपटला. त्यामुळे त्यांचे शरीर अक्षरशः विदीर्ण झाले. रफिक काही अंतरावर हवेत फेकले गेले आणि वियोगी इंजिनिअरिंग (प्लॉट नं. SS-45, 46, 47) या कंपनीच्या आवारात कोसळले. नागरिकांनी तातडीने मदतकार्य सुरू केले.

जखमी रफिक यांना रुग्णालयात नेण्यासाठी वारंवार अँम्ब्युलन्सला कॉल करण्यात आला, परंतु अँम्ब्युलन्स न आल्याचा आरोप नागरिकांनी केला. अखेर रफिक यांचा मुलगा आरिफ आणि कुटुंबीयांनी खासगी वाहनाने त्यांना घाटी रुग्णालयात नेले. मात्र तेथील डॉक्टरांनी तपासून त्यांना मृत घोषित केले. स्फोटात ऑटोमोबाईल दुकानातील कर्मचारी सचिन भालेराव यांच्या पायालाही गंभीर दुखापत झाली आहे.

स्फोटाचा प्रचंड आवाज आणि नुकसान

स्फोट इतका तीव्र होता की आसपासच्या परिसरातील अनेक इमारती हादरल्या. दर्शन प्लास्टिक (प्लॉट नं. W-71) आणि प्लॉट D-42 मधील कंपन्यांचे काचांचे नुकसान झाले. टँकरचा एक लोखंडी भाग कंपनीच्या कंपाउंडवर आदळून खाली पडला. सुदैवाने कामगार त्या वेळी चहाच्या ब्रेकवर असल्याने मोठी जीवितहानी टळली.

घटनेची माहिती मिळताच वाळूज एमआयडीसी अग्निशमन केंद्राला दुपारी ३.४५ वाजता संपर्क करण्यात आला. अग्निशमन दलाने तातडीने घटनास्थळी धाव घेऊन आग आटोक्यात आणली. त्याचवेळी वाळूज पोलीस ठाण्याचे वरिष्ठ पोलीस निरीक्षक रामेश्वर गाडे, वाहतूक शाखेचे उपनिरीक्षक विठ्ठल घोडके आणि पोलिस कर्मचारी घटनास्थळी दाखल झाले.

पोलिस निरीक्षक रामेश्वर गाडे म्हणाले, “या दुर्घटनेस कारणीभूत असलेल्या चालक आणि वेल्डिंग शॉप मालकावर कायदेशीर कारवाई केली जाईल. चौकशी सुरू असून, निष्काळजीपणाबद्दल योग्य ती दंडात्मक पावले उचलली जातील.”

ही घटना एमआयडीसीतील सुरक्षेचा गंभीर प्रश्न उपस्थित करते. अनधिकृत व्यवसाय, निष्काळजीपणा आणि सुरक्षेचे नियम न पाळल्याने झालेली ही दुर्घटना प्रशासनासाठी धोक्याची घंटा ठरली आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/IUr4T19zTCmAWLrpodS5ui?mode=ems_copy_t

*जाहिरातीसाठी_संपर्क करा 8329014805*