छत्रपती संभाजीनगर : जिल्ह्यात जिल्हा परिषद आणि पंचायत समिती निवडणुकांच्या पार्श्वभूमीवर गुरुवारी सायंकाळपासून जाहीर प्रचारावर पूर्णतः बंदी लागू झाली असून आता उमेदवारांनी गुप्त बैठका आणि घराघरांत जाऊन मतदारांशी संपर्क साधण्यावर भर दिला आहे. एकूण ६३० उमेदवार रिंगणात असून उद्या शनिवार रोजी मतदान आणि सोमवारी रोजी मतमोजणी होणार आहे.
निवडणूक प्रशासनाकडून आदर्श आचारसंहिता कडकपणे राबवली जात असून कोणत्याही प्रकारच्या प्रभाव टाकणाऱ्या प्रचारावर लक्ष ठेवले जात आहे. जिल्ह्यातील ६३ गट आणि १२६ पंचायत समिती गणांसाठी ही निवडणूक होत असून ग्रामीण भागात राजकीय वातावरण चांगलेच तापले आहे. उमेदवारांनी शेवटच्या टप्प्यात मतदारांपर्यंत पोहोचण्यासाठी विविध मार्गांचा अवलंब केला असून मोठ्या सभा थांबल्या असल्या तरी वैयक्तिक भेटीगाठींना वेग आला आहे.
जिल्ह्यात एकूण २ हजार २२२ मतदान केंद्रांवर मतदान होणार असून सकाळी ७.३० ते सायंकाळी ५.३० वाजेपर्यंत मतदारांना आपला हक्क बजावता येणार आहे. सुमारे १८ लाख ६३ हजार ५३३ मतदार मतदानासाठी पात्र असून त्यामध्ये पुरुष आणि महिला मतदारांची संख्या मोठ्या प्रमाणात आहे. याशिवाय ४९ मतदान केंद्रे अतिसंवेदनशील म्हणून घोषित करण्यात आली असून तेथे विशेष सुरक्षा व्यवस्था ठेवण्यात आली आहे.
निवडणूक प्रक्रिया शांततेत पार पडावी यासाठी प्रशासन सज्ज झाले असून सुमारे १२ हजार कर्मचाऱ्यांची नियुक्ती करण्यात आली आहे. पोलिस बंदोबस्तही कडक ठेवण्यात आला असून कोणताही अनुचित प्रकार घडू नये यासाठी सतत नजर ठेवली जात आहे. ग्रामीण विकासाच्या दृष्टीने महत्त्वाच्या असलेल्या या निवडणुकीकडे सर्वांचे लक्ष लागले असून उद्याच्या मतदानातून जनतेचा कौल स्पष्ट होणार आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/IJbzVXxActY7zUsWoQ3lSr?mode=gi_t
*जाहिरातीसाठी_संपर्क करा 8329014805*