🚨 आरटीओ चालनच्या बनावट APK फाइलचा सायबर सापळा; कंपनी मालकाच्या खात्यातून १ कोटींची फसवणूक, सायबर पोलिसांच्या अवघ्या दोन तासांच्या तत्पर कारवाईने संपूर्ण रक्कम सुरक्षित

छत्रपती संभाजीनगर : सायबर चोरट्यांनी आरटीओ चालनच्या नावाखाली एपीके (APK) फाइल पाठवून शहरातील एका कंपनी मालकाचा मोबाईल हॅक करत तब्बल १ कोटी रुपयांची फसवणूक करण्याचा प्रयत्न केला. मात्र, सायबर पोलिसांच्या अत्यंत तत्पर आणि वेळेवर केलेल्या कारवाईमुळे ही संपूर्ण रक्कम अवघ्या दोन तासांत सुरक्षित करण्यात यश आले. या कारवाईमुळे मोठा आर्थिक फटका टळला असून सायबर पोलिसांच्या कार्यक्षमतेचे कौतुक होत आहे.

मिळालेल्या माहितीनुसार, शहरातील एनव्ही बायोटेक कंपनीच्या मालकाच्या मोबाईलवर ४ ऑगस्ट रोजी आरटीओ चालन असल्याचे भासवणारी एक एपीके फाइल आली होती. ती फाइल उघडल्यानंतर मोबाईल हॅक झाला. त्यानंतर सायबर चोरट्यांनी कंपनीच्या अकाउंटंटला व्हॉट्सअॅपवरून मेसेज पाठवून १ कोटी रुपये एका खात्यात आरटीजीएसद्वारे जमा करण्याचे निर्देश दिले. दुपारी सुमारे १२.३० वाजता अकाउंटंटने व्यवहार पूर्ण केला. मात्र, काही मिनिटांतच आणखी ४ कोटी रुपयांची मागणी करण्यात आल्याने संशय निर्माण झाला. अकाउंटंटने कंपनी मालकाशी संपर्क साधताच मोबाईल हॅकिंगचा प्रकार उघडकीस आला.

त्यानंतर कंपनी मालकाने तातडीने सायबर पोलिस ठाण्यात धाव घेतली. विशेष म्हणजे, पोलिसांनी नेहमीप्रमाणे ‘१९३०’ हेल्पलाइनची संपूर्ण प्रक्रिया पूर्ण होण्याची वाट न पाहता तक्रार नोंदविण्याबरोबरच समांतर कारवाई सुरू केली. निरीक्षक सोमनाथ जाधव आणि सहायक निरीक्षक कदीर देशमुख यांच्या पथकाने थेट दिल्लीस्थित इंडियन सायबर क्राइम को-ऑर्डिनेशन सेंटर (I4C) शी संपर्क साधला. केंद्रीय समन्वयाच्या माध्यमातून उत्तर प्रदेशातील चार वेगवेगळ्या बँकांच्या नोडल अधिकाऱ्यांशी तातडीने संपर्क साधून संबंधित खाती काही मिनिटांतच गोठवण्यात आली. त्यामुळे संपूर्ण १ कोटी रुपयांची रक्कम सुरक्षित राहिली.

सायबर गुन्हेगार अवघ्या काही मिनिटांत पैसे विविध खात्यांमध्ये वळवून रोख रक्कम काढतात. मात्र, या प्रकरणात पोलिसांनी दाखविलेल्या तत्परता, मानवी हस्तक्षेप आणि वेगवान समन्वयामुळे चोरट्यांचा डाव पूर्णपणे उधळून लावण्यात आला. नागरिकांनी अज्ञात एपीके फाइल, संशयास्पद लिंक किंवा संदेशांवर क्लिक करू नये आणि कोणतीही आर्थिक फसवणूक झाल्यास तातडीने सायबर पोलिसांशी संपर्क साधावा, असे आवाहन करण्यात आले आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KYaIrqX6xIM3SpZ1FYjFWw?s=cl&p=a&ilr=0

*जाहिरातीसाठी_संपर्क करा 8329014805*