atm-card-fraud-aurangabad-retired-pharmacist
छत्रपती संभाजीनगर : जिल्हाधिकारी कार्यालयासमोरील एटीएममध्ये हातचलाखीने कार्ड बदलून एका सेवानिवृत्त वरिष्ठ फार्मासिस्टची तब्बल ३७ हजार रुपयांची फसवणूक करण्यात आली. १४ फेब्रुवारी रोजी सायंकाळी साडेसहा वाजता घडलेल्या या घटनेत दोन अज्ञात व्यक्तींनी बनावट सहानुभूती दाखवत त्यांचा विश्वास संपादन केला आणि संधी साधून त्यांच्या एटीएम कार्डाची अदलाबदल केली.
फिर्यादी सलीम पाशा बशीरुद्दीन (रा. संभाजीनगर) हे जिल्हा परिषदेच्या प्राथमिक आरोग्य केंद्रात वरिष्ठ फार्मासिस्ट पदावरून सेवानिवृत्त झालेले आहेत. ते एटीएममधून पैसे काढत असताना दोन तरुणांनी त्यांच्याशी संभाषण साधले आणि व्यवहार पूर्ण न झाल्याचे सांगून पुन्हा पिन टाकण्यास प्रवृत्त केले. यावेळी गोंधळ घालत चोरट्यांनी त्यांचे कार्ड बदलले.
घरी परतल्यानंतर मोठ्या रकमेचा व्यवहार झाल्याचा संदेश मिळताच त्यांनी कार्ड तपासले आणि त्यावर वेगळ्या व्यक्तीचे नाव आढळले. यामुळे त्यांना फसवणुकीचा साक्षात्कार झाला. तत्काळ सिटी चौक पोलीस ठाण्यात तक्रार दाखल करण्यात आली असून पोलिसांनी अज्ञात दोन चोरट्यांविरोधात गुन्हा दाखल केला आहे.
या घटनेमुळे एटीएम वापरणाऱ्या नागरिकांनी अधिक सावधगिरी बाळगावी, असे पोलिसांनी आवाहन केले आहे. अनोळखी व्यक्तींकडून मदत घेणे टाळावे आणि व्यवहार करताना पूर्ण सतर्कता राखावी, असेही सांगण्यात आले आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Br29avqYAlRCU4ytjYm4PJ
*जाहिरातीसाठी_संपर्क करा 8329014805*