🚨 शहानूर मिया चौकात गांजा तस्कर अटक; २ लाखांहून अधिकचा माल जप्त 🚨

छत्रपती संभाजीनगर : शहरातील शहानूर मिया दर्गा चौक परिसरात रविवारी (५ ऑक्टोबर) रात्री जवाहरनगर पोलिसांनी एक मोठी कारवाई करत गांजा तस्कराच्या मुसक्या आवळल्या. पोलिसांनी त्याच्याकडून २ लाख १० हजार ६०० रुपयांचा १० किलो १७५ ग्रॅम गांजा जप्त केला आहे. अटक करण्यात आलेल्या आरोपीचे नाव इरफान पाशा आरीफ पाशा (वय ४२, रा. भंगी कॉलनी, पेन्शन मोहल्ला, दक्षिण बंगळुरू) असे असून तो हा गांजा बंगळुरू येथे विक्रीसाठी घेऊन जात असल्याची कबुली त्याने दिली.

पोलिसांचा सापळा आणि अटक

जवाहरनगर पोलिसांना गुप्त माहिती मिळाल्यानंतर वरिष्ठ पोलीस निरीक्षक सचिन कुंभार यांच्या मार्गदर्शनाखाली पथकाने दर्गा चौकातील आठवडे बाजार मैदानात सापळा रचला. रात्री साडेनऊच्या सुमारास निळा शर्ट परिधान केलेला संशयित व्यक्ती दिसताच पोलिसांनी त्याला थांबवण्याचा प्रयत्न केला. मात्र तो पळ काढू लागल्याने पोलिसांनी पाठलाग करून त्याला काही अंतरावरच पकडले. तपासात त्याच्या बॅगांमध्ये मोठ्या प्रमाणात गांजा आढळून आला.

पोलिसांनी आरोपीविरुद्ध गुन्हा दाखल करून त्याला अटक केली असून, न्यायालयाने त्याला चार दिवसांची पोलीस कोठडी सुनावली आहे. या कारवाईत सहाय्यक पोलीस निरीक्षक लोहकरे, उपनिरीक्षक राहुल बिघोत, रावसाहेब वाघ, तसेच पोलिस कर्मचारी रमेश जाधव, संदीप क्षीरसागर, बनकर, मारोती गोरे आणि ज्ञानेश्वर शेलार यांनी सहभाग घेतला. या प्रकरणाचा पुढील तपास पोलीस उपनिरीक्षक रावसाहेब वाघ करत आहेत.

ही कारवाई पोलीस आयुक्त प्रवीण पवार, उपायुक्त प्रशांत स्वामी आणि सहाय्यक पोलीस आयुक्त मनिष कल्याणकर यांच्या मार्गदर्शनाखाली करण्यात आली. शहरात वाढत्या अंमली पदार्थांच्या विरोधात पोलिसांची ही कारवाई महत्त्वपूर्ण मानली जात आहे.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/Ii8cI59VTTI77JxAW1zpnq?mode=ems_copy_t

*जाहिरातीसाठी_संपर्क करा 8329014805*