🚨 भरधाव ट्रकची भीषण धडक – नव्या मोपेडवरून जाणाऱ्या दांपत्याचा जागीच मृत्यू! 🚨

छत्रपती संभाजीनगर : सिडको वाळूज महानगर-१ च्या प्रवेशद्वाराजवळ सोमवारी (दि. २७) दुपारी झालेल्या भीषण अपघातात पती-पत्नीचा जागीच मृत्यू झाला. या घटनेमुळे परिसरात हळहळ व्यक्त होत आहे.

मृतांची नावे संजय पंडित राऊत (वय ३५) आणि अनिता संजय राऊत (वय ३२, दोघे रा. साठेनगर, वाळूज) अशी आहेत. मिळालेल्या माहितीनुसार, संजय राऊत हे आपल्या नव्या मोपेडचे आरटीओ नोंदणी प्रमाणपत्र (रजिस्ट्रेशन) काढण्यासाठी शहरात गेले होते. काम आटोपून पत्नीसमवेत वाळूजकडे परतत असताना त्यांच्या मोपेडला भरधाव ट्रकने जोरदार धडक दिली.

धडक एवढी भीषण होती की, दांपत्य रस्त्यावर फेकले गेले आणि ट्रकच्या मागच्या चाकाखाली चिरडले गेले. या भीषण अपघातात दोघांचाही जागीच मृत्यू झाला. घटनेनंतर ट्रकचालक वाहनासह पसार झाला असून पोलिसांनी त्याचा शोध सुरू केला आहे.

अपघाताची माहिती मिळताच वाहतूक शाखेचे पोलिस उपनिरीक्षक शंकर शिरसाट, हेड कॉन्स्टेबल अरुण फोलाने, विकास कांबळे, कॉन्स्टेबल किशोर साळवे आणि एमआयडीसी वाळूज पोलिस ठाण्याचे कर्मचारी घटनास्थळी दाखल झाले. त्यांनी दोघांना तत्काळ घाटी रुग्णालयात हलविले; मात्र डॉक्टरांनी तपासून त्यांना मृत घोषित केले.

दरम्यान, अपघातानंतर परिसरात काही काळ वाहतूक ठप्प झाली होती. पोलिसांनी ट्रकच्या क्रमांकाच्या आधारे चौकशी सुरू केली असून ट्रकचालकाला अटक करण्यासाठी एमआयडीसी वाळूज पोलिस प्रयत्न करत आहेत.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/HECW4lJo5J4AfPZGuYcj4E?mode=wwt

*जाहिरातीसाठी_संपर्क करा 8329014805*