Attempted-Rape-Brutal-Attack-Aurangabad
छत्रपती संभाजीनगर जिल्ह्यात एक हृदय पिळवटून टाकणारी घटना घडली आहे. ३६ वर्षीय विवाहितेवर बलात्काराचा प्रयत्न केल्यानंतर विरोध केला म्हणून आरोपीने तिच्यावर १५ पेक्षा अधिक चाकूचे वार केले. तिचा चेहराही विद्रूप करत हत्या करण्याचा प्रयत्न करण्यात आला. ही धक्कादायक घटना रविवारी सायंकाळी घडली.
अभिषेक तात्याराव नवपुते (१९, रा. घारदोन) असे या विकृताचे नाव असून, तो अनेक दिवसांपासून विवाहितेचा पाठलाग करत होता. २ मार्च रोजी संध्याकाळी शेतात काम करत असताना त्याने तिच्यावर बलात्काराचा प्रयत्न केला. परंतु, महिलेने तीव्र विरोध केल्याने संतप्त झालेल्या अभिषेकने तिचा गळा आवळला, तिला जमिनीवर आपटले आणि शरीरभर चाकूने भोसकले. तिच्या चेहरा, पोट, मान, डोक्यावरही हल्ला करण्यात आला.
यातही समाधान न मानता आरोपीने रक्तबंबाळ अवस्थेत असलेल्या महिलेवर पुन्हा अत्याचार करण्याचा प्रयत्न केला. ती बेशुद्ध पडताच तिच्या डोक्यात दगड मारून तो पसार झाला. काही वेळाने सासूने रक्ताच्या थारोळ्यात पडलेल्या सुनेला पाहून तातडीने कुटुंबीयांना कळवले आणि तिला शहरात नेण्यात आले.
सोमवारी रात्री शुद्धीवर आल्यावर विवाहितेने पोलिसांना सर्व प्रकार सांगितला. त्यानंतर पोलिसांनी तातडीने गुन्हा दाखल केला. आरोपी गावाच्या शेतात लपून बसला होता. पोलीस अधीक्षक डॉ. विनयकुमार राठोड आणि उपअधीक्षक पूजा नांगरे यांच्या मार्गदर्शनाखाली निरीक्षक रविकिरण दरवडे आणि उपनिरीक्षक सतीश पंडित यांच्या पथकाने त्याला अटक केली.
सध्या महिलेवर रुग्णालयात उपचार सुरू असून, तिच्या शरीरावर तब्बल ५२ टाके पडले आहेत. आरोपीवर कठोर कारवाईची मागणी केली जात आहे.
________________________
*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*
https://chat.whatsapp.com/Br29avqYAlRCU4ytjYm4PJ
*जाहिरातीसाठी_संपर्क करा 8329014805*
