💥 ३०० रुपयांच्या लाचेप्रकरणी मुख्याध्यापिका एसीबीच्या जाळ्यात!

छत्रपती संभाजीनगर : शहरातील छावणी भागात असलेल्या हॉली क्रॉस मराठी हायस्कूलमध्ये लाचलुचपत प्रतिबंधक विभागाने (एसीबी) मोठी कारवाई करत मुख्याध्यापिकेला लाच स्वीकारताना रंगेहाथ पकडले. गुरुवारी (दि. ९) ही कारवाई पार पडली असून मारिया जोस एस्तीबेरो (वय ५२) असे अटक करण्यात आलेल्या मुख्याध्यापिकेचे नाव आहे. या घटनेमुळे शैक्षणिक क्षेत्रात खळबळ उडाली आहे.

मिळालेल्या माहितीनुसार, एका माजी विद्यार्थ्याला वैयक्तिक कामासाठी शाळेचा ‘प्रवेश निर्गम उतारा’ आवश्यक होता. यासाठी त्याने मुख्याध्यापिका एस्तीबेरो यांच्याशी संपर्क साधला असता, त्यांनी उतारा देण्यासाठी ५०० रुपयांची मागणी केली. संबंधित विद्यार्थ्याने आवश्यक कागदपत्रे स्पीड पोस्टाने पाठवूनही, पैशांशिवाय काम होणार नसल्याचे स्पष्ट करण्यात आले.

लाच देण्याची इच्छा नसल्याने तक्रारदाराने ७ एप्रिल रोजी एसीबीकडे तक्रार नोंदवली. त्यानंतर ८ एप्रिल रोजी एसीबीने पडताळणी केली असता, मुख्याध्यापिकेने ३०० रुपये स्वीकारण्याचे मान्य केल्याचे निष्पन्न झाले. त्यानुसार एसीबीच्या पथकाने सापळा रचला.

गुरुवारी दुपारी मुख्याध्यापिकेच्या कक्षात तक्रारदाराकडून ३०० रुपये स्वीकारल्यानंतर एसीबीच्या अधिकाऱ्यांनी तत्काळ कारवाई करत त्यांना ताब्यात घेतले. यावेळी त्यांच्या ताब्यातून लाचेची रक्कम तसेच सुमारे १५ हजार रुपये किमतीचा मोबाईल जप्त करण्यात आला आहे.

सध्या त्यांच्या राहत्या घराची झडती सुरू असून छावणी पोलीस ठाण्यात गुन्हा नोंदवण्याची प्रक्रिया सुरू आहे. ही कारवाई एसीबीच्या पोलीस अधीक्षक माधुरी केदार कांगणे यांच्या मार्गदर्शनाखाली पोलीस निरीक्षक चैनसिंग गुसिंगे, वाल्मिक कोरे, राजेंद्र नंदिले, सचिन बारसे, आशा कुंटे आणि चांगदेव बागुल यांच्या पथकाने यशस्वीपणे पार पाडली.

________________________

*”द छत्रपती संभाजीनगर न्यूज “च्या व्हाट्सएप ग्रुप मध्ये जॉईन होण्यासाठी खालील लिंकवर क्लीक करा….*

https://chat.whatsapp.com/KuJrJlfinbj4dlldQCNIAb?mode=gi_t

*जाहिरातीसाठी_संपर्क करा 8329014805*